Lestu um leikinn: FH 2 -  3 Breiðablik

FH og Breiðablik áttust við í úrslitaleik Mjólkurbikars kvenna í dag og var þetta fimmti úrslitaleikur Mjólkurbikarsins í röð sem Blikar taka þátt í, en þær höfðu tapað þrjú ár í röð fyrir leik dagsins.

Úrslitaleikurinn reyndist gríðarlega fjörugur þar sem bæði lið komust nálægt því að skora á upphafsmínútunum, áður en Thelma Karen Pálmadóttir kom boltanum í netið með skoti sem breytti um stefnu af varnarmanni. Blikar náðu ekki að hreinsa hornspyrnu FH-inga nægilega langt í burtu og datt boltinn til Thelmu rétt utan vítateigs.

Blikar fengu nokkur góð færi til að jafna metin áður en komið var að Samantha Smith. Hún skoraði úr góðu færi eftir frábæran undirbúning frá Berglindi Björgu Þorvaldsdóttur.

Staðan var því jöfn eftir kaflaskiptan fyrri hálfleik, þar sem FH var sterkara liðið í byrjun en Blikar tóku svo völdin á vellinum.

Blikar voru talsvert sterkari aðilinn í upphafi síðari hálfleiks og komust í nokkur dauðafæri áður en Thelma Karen tók forystuna fyrir FH á nýjan leik, í þetta skipti þvert gegn gangi leiksins. Thelma fékk boltann við hliðarlínuna í vel útfærðri skyndisókn og keyrði inn á teiginn áður en hún lét vaða að marki. Boltinn hrökk aftur af varnarmanni, svipað og í fyrra markinu, áður en hann endaði í netinu.

Blikar komust í dauðafæri strax eftir að hafa lent aftur undir og jöfnuðu svo metin skömmu síðar. Í þetta sinn var komið að Birtu Georgsdóttur sem átti mjög gott hlaup og frábæra afgreiðslu til að jafna leikinn.

Staðan orðin 2-2 og á næstu mínútum voru það Hafnfirðingar sem sköpuðu sér dauðafæri án þess að nýta þau. Fyrst var Elísa Lana Sigurjónsdóttir hársbreidd frá því að taka forystuna fyrir FH í þriðja sinn í leiknum, áður en Thelma Karen skaut í innanverða stöngina en boltinn rataði ekki innfyrir marklínuna.

Hvorugu liði tókst að bæta marki við leikinn svo gripið var til framlengingar. Það tók Samantha Smith aðeins sjö mínútur af framlengingunni til að taka forystuna fyrir Breiðablik í fyrsta sinn í leiknum og áttu FH-ingar engin svör fyrr en á lokamínútunum.

Maya Hansen skaut í slá á 115. mínútu og setti Arna Eiríksdóttir boltann í netið á 119. mínútu en ekki dæmt mark vegna naumrar rangstöðu.

FH tókst ekki að ógna marki í uppbótartímanum svo lokatölur urðu 2-3 fyrir Breiðablik sem vinnur Mjólkurbikarinn í annað sinn á fimm árum.