Postecoglou kom sjálfum sér til varnar: Enda alltaf með bikar

Gífurleg pressa er á Ange Postecoglou sem er án sigurs eftir sjö leiki síðan hann tók við Nottingham Forest eftir að Nuno Espirito Santo var rekinn í síðasta mánuði.

Forest hefur verið að skoða sín mál og er Sean Dyche, fyrrum stjóri Burnley, orðaður við Forest.

Forest tekur á móti Chelsea á morgun og á fréttamannafundi í dag hélt Postecoglou fimm mínútna ræðu þar sem hann kom sjálfum sér til varnar.

„Þegar ég tók við Tottenham sagði formaðurinn við mig að félagið þyrfti að vinna bikar. Við unnum bikar (Evrópudeildina) en eina sem er talað um er að við enduðum í sautjánda sæti. Ef þið horfið bara á þá staðreyndi þá getið þið sagt að ég sé misheppnaður stjóri sem er heppinn að fá annað tækifæri," segir Postecoglou.

„En ef ég þarf að útskýra af hverju við enduðum í sautjánda sæti þá þarf bara að horfa á liðið sem ég stillt upp í síðustu fimm eða sex leikjunum og skoða hvar áherslan var. Hverjir voru á bekknum og hverjir spiluðu. Fyrir síðasta leikinn þá voru leikmenn úti að skemmta sér í tvo daga. Það var eitthvað sem ég leyfði því mér fannst þeir eiga það skilið."

„Ég lít á sjálfan mig sem sigurvegara. Hjá öllum mínum fyrrum félögum hefur þetta endað eins: Ég með bikar."

Postecoglou stýrði Tottenham til sigurs í Evrópudeildinni í maí en það var fyrsti bikar Tottenham í sautján ár og fyrsti Evróputitill í 41 ár.