„Þetta var bara jafn leikur allan leikinn. Ef að þeir hefðu skorað í stöðunni 2-0 þá hefði þetta bara orðið gríðarlega erfiður leikur. Þetta var erfiður leikur allan leikinn og við vissum það alveg. Við þurftum að gera meira en að spila bara góðan fótbolta, við þurftum að vera solid varnarlega og vera tilbúnir að hlaupa og berjast. Ég held að við höfum bara gert það mjög vel,'' sagði Gylfi Þór Sigurðsson, leikmaður Víkings R., eftir 0-2 sigur á KA í Bestu-deild karla í kvöld. Gylfi Þór átti flottan leik þar sem að hann lagði upp og skoraði fyrir gestina.
Lestu um leikinn: KA 0 - 2 Víkingur R.
KA liðið er talsvert neðar en Víkingar, en Gylfi Þór hrósaði þeim og telur liðið eiga meira inni.
„Mér finnst staðan í deildinni ekki vera kannski sanngjörn miðað við hvernig þeir spiluðu í dag. Mér fannst erfitt að spila á móti þeim. Þeir eru góðir varnarlega, sköpuðum ekkert mikið af færum. Skorum eftir fast leikatriði og áttum nokkur önnur færi úr aukaspyrnum eða hornum. En þeir eru góðir í skyndisóknum, eru góðir í að spila á milli sín og koma sér í gegn hratt og þeir eru góðir í að koma boltanum út á kant til að koma krossum inn. Mér fannst varnarmennirnir hjá okkur og eiginlega allt liðið bara verjast krossunum, hornunum og innköstunum hjá þeim bara mjög vel,'' sagði Gylfi Þór.
Víkingar fengu FC Malisheva frá Kósovó í 1. umferð Sambandsdeildar Evrópu. Hvernig leggst það verkefni í Gylfa?
„Mjög vel bara! Það hefði verið fínt að fá kannski aðeins betra ferðalag út, en held að það sé fínt bara að byrja á útileiknum og koma síðan strax heim og undirbúa sig fyrir seinni leikinn. Alltaf gaman að spila í Evrópu,'' sagði Gylfi.
Víkingar eru í toppsæti Bestu-deildar karla, þrátt fyrir umræðu um að liðið sé kannski eins sterkt og áður.
„Við vitum það að yfir heilt tímabil þá muntu ekkert spila vel í öllum leikjum, en þú þarft bara að vinna leiki. Þarft að vera góður varnarlega og fá ekki á þig mikið af mörkum. Bara að nýta færin sem að þú færð og síðan bara gæðin í liðinu - við munum örugglega í fleiri leikjum en færri spila vel og kannski stýra leikjunum. Við erum sjálfir sammála um það að við höfum verið að spila vel, en getum verið betri. Við komumst allavega ekkert ofar eins og er en þetta er mjög jafnt, þannig að við verðum bara að halda okkar striki og vinna okkar leiki,'' sagði Gylfi Þór Sigurðsson.
Viðtalið má sjá í heild sinni í spilaranum hér að ofan.
