„Bara mjög sáttur með frammistöðu liðsins, að mestu leyti. Mér fannst við sérstaklega massífir varnarlega séð. KA menn voru að senda langa bolta inn í teiginn og mikið af krossum á okkur. Varnarmennirnir stóðu sig sérstaklega vel í að hreinsa alla bolta, ég er virkilega sáttur með hvernig þeir vörðu teiginn sinn. Annars var þetta bara vel gert hjá okkur, komumst yfir með góðu marki úr aukaspyrnu og síðan fannst mér aldrei hætta í þessu. Bara solid, sigldum þessu heim og tókum svosem engar áhættur eftir það. Koma norður, taka þrju stig og drulla okkur aftur heim,'' sagði brosandi Sölvi Geir Ottesen, þjálfari Víkings R. eftir 2-0 sigur á KA í Bestu-deild karla í kvöld.
Lestu um leikinn: KA 0 - 2 Víkingur R.
Oliver Ekroth og Gunnar Vatnhamar skölluðu ófáa boltana í burtu frá vítateig Víkinga og virtust hreinlega njóta þess að verjast. Það er oft talað um að það sé hverfandi eiginleiki í nútímafótbolta - en greinilega ekki!
„Ég hefði samt sem áður verið til í að við kæmum í veg fyrir þessa krossa, kannski fullmargir krossar sem að við vorum að fá á okkur, en við erum með stóra, öfluga og sterka varnarmenn og bara fílum það ef að boltinn kemur inná teig að þá bara sköllum við hann í burtu. Það koma móment þar sem að þú þarft bara aðeins að liggja og verja markið þitt. Það á bara að vera skemmtilegt líka,'' sagði Sölvi.
Víkingar tróna á toppi Bestu-deildar karla, en umræðan hefur þó verið þannig að meira búi í liðinu. Er eitthvað til í því?
„Það er bara frábært ef að þú ert á toppnum og átt helling eftir inni! Við erum svosem alltaf að vinna í því að bæta okkar leik og erum ekkert endilega að spá í því hvort að við eigum eitthvað meira inni eða ekki. Við erum bara alltaf að reyna að bæta okkur á hinum og þessum sviðum leiksins og það gengur bara ágætlega. Þannig að við höldum bara áfram og vonandi eigum við bara hellings inni,'' sagði Sölvi Geir.
Viðtalið má sjá í heild sinni í spilaranum hér að ofan.
