Leiknir og ÍBV eigast við í fyrsta leik 14. umferðar Bestu deildar karla þessa stundina. Rúmur klukkutími er liðinn af leiknum og er staðan orðin 4-1 fyrir ÍBV.
Lestu um leikinn: Leiknir R. 1 - 4 ÍBV
Leiknismenn fengu 5-0 skell gegn KA í síðustu umferð og gerði Siggi Höskulds fimm breytingar á byrjunarliðinu í dag frá þeim leik.
Það gekk lítið upp þar sem staðan var 2-0 í hálfleik og Siggi tók til þeirra ráða að gera fjórfalda skiptingu í hálfleik. Það skilaði sér ágætlega þar sem Birgir Baldvinsson skoraði eftir aðeins 14 sekúndur í seinni hálfleik.
"Jæja 2-0 í hálfleik og Leiknismenn geta bara þakkað fyrir að vera ekki fleiri mörkum undir farandi inn í hálfleik þar sem þeir hafa ekkert getað! Siggi Höskulds líklega að taka hárblásarann núna í hálfleik.." skrifaði Laufdal í hálfleik.
Fimmta og síðasta skipting Leiknis kom svo eftir aðeins tíu mínútna leik í síðari hálfleik.
Leiknismenn hafa nú fengið á sig 9 mörk í síðustu tveimur leikjum, báðir á heimavelli.
