Það er ekki vanalegt að sjá leiki enda 0-0 í deildinni en sú var raunin í dag og í kvöld, þar sem þrír af fjórir leikjum enduðu 0-0. Einu liðin sem skoruðu í dag voru Crystal Palace og Fulham í 1-1 jafntefli sín á milli.

Nýliðar Sunderland tóku á móti stórveldi Manchester City og úr varð skemmtilegur slagur. Heimamenn í Sunderland sýndu frábæra spilamennsku í fyrri hálfleik, þeir voru sterkari aðilinn en tókst ekki að skapa mikið af færum eða skora. Brian Brobbey slapp í gegn í besta færinu fyrir leikhlé en Gianluigi Donnarumma gerði vel að verja.

Staðan var markalaus í leikhlé og byrjaði Man City seinni hálfleikinn á að missa Nico González og Savinho meidda af velli. Rodri og Jeremy Doku, sem eru sjálfir nýkomnir úr meiðslum, komu inn í staðinn og skipti City um gír.

Lærlingar Pep Guardiola fengu góð færi til að taka forystuna en komu boltanum ekki í netið. Robin Roefs varði frábærlega í tvígang og fóru aðrar marktilraunir fínt framhjá markinu eða í varnarmenn sem köstuðu sér fyrir hvert skotið fætur öðru.

City var með yfirhöndina en heimamenn í Sunderland voru skeinuhættir. Hvorugu liði tókst þó að skora svo lokatölur urðu 0-0 eftir skemmtilegan slag.

City komst næst því að skora þegar Bernardo Silva setti boltann í netið af stuttu færi en var í afar naumri rangstöðu.

Þetta eru gleðitíðindi fyrir topplið Arsenal sem er núna með fjögurra stiga forystu á City. Sunderland er áfram í baráttu um evrópusæti, með 29 stig eftir 19 umferðir.

Á sama tíma skildu Brentford og Tottenham jöfn í fyrsta sinn sem Thomas Frank mætir aftur í heimsókn til fyrrum vinnuveitenda sinna.

Þar mættust liðin í afar jöfnum slag þar sem lítið var um færi og engum tókst að skora. Tottenham fékk besta færið í fyrri hálfleik á meðan Brentford fékk besta færið í seinni hálfleik.

Brentford er um miðja deild með 27 stig, einu stigi fyrir ofan Tottenham.

Sunderland 0 - 0 Man City

Brentford 0 - 0 Tottenham