18. umferð ítalska deildartímabilsins hefst í kvöld þegar toppbaráttulið AC Milan heimsækir Cagliari sem er í neðri hlutanum. Lærisveinar Max Allegri hjá Milan sitja í öðru sæti, einu stigi á eftir toppliði Inter sem eru jafnframt nágrannar og erkifjendur félagsins.

Það er því mikið undir fyrir Milan í kvöld en liðið hefur verið að glíma við mikil meiðslavandræði í sóknarlínunni að undanförnu. Niclas Füllkrug virðist vera á leið til félagsins frá West Ham en verður ekki kominn í tæka tíð fyrir upphafsflautið í Sardiníu. Christopher Nkunku er þá að glíma við meiðsli alveg eins og Santiago Giménez. Christian Pulisic og Rafael Leao eru tæpir.

Lærlingar Cesc Fábregas í liði Como taka á móti Udinese í hádegisleiknum á morgun en fimm stig skilja liðin að í efri hluta deildarinnar. Como er í evrópusæti með 27 stig eftir 16 umferðir.

Mikael Egill Ellertsson og félagar í liði Genoa mæta til leiks gegn nýliðum Pisa á morgun áður en stórveldi Juventus, sem leikur nú undir stjórn Luciano Spalletti, tekur á móti Þóri Jóhanni Helgasyni og félögum frá Lecce.

Atalanta og Roma eigast að lokum við í stórleik laugardagsins. Þar mætir Gian Piero Gasperini aftur á leikvanginn í Bergamó í fyrsta sinn eftir að hafa skipt frá Atalanta síðasta sumar. Gasperini hafði þjálfað Atalanta í níu ár þegar hann hætti til að flytja til Rómar. Hann getur búist við góðum móttökum frá stuðningsfólki Atalanta.

Roma er aðeins þremur stigum frá toppsætinu í Serie A, ellefu stigum fyrir ofan Atalanta.

Maurizio Sarri og lærlingar hans í Lazio eiga svo leik við Ítalíumeistara Napoli í hádeginu á sunnudag en Taty Castellanos verður ekki með þar sem hann er að ljúka félagaskiptum til West Ham. Þar má búast við gríðarlega spennandi slag þó að tíu stig skilji á milli liðanna á stöðutöflunni.

Napoli er tveimur stigum frá toppsætinu á meðan Lazio er að berjast um evrópusæti.

Albert Guðmundsson og félagar í botnliði Fiorentina verða að leggja nýliða Cremonese að velli á sunnudaginn, áður en topplið Inter spilar við Bologna í öðrum stórleik.

Það eru aðeins tvær vikur liðnar síðan Inter og Bologna mættust síðast. Bologna hafði þá betur eftir vítaspyrnukeppni í undanúrslitaleik ítalska ofurbikarsins skömmu fyrir jól.

Föstudagur
19:45 Cagliari - Milan

Laugardagur
11:30 Como - Udinese
14:00 Sassuolo - Parma
14:00 Genoa - Pisa
17:00 Juventus - Lecce
19:45 Atalanta - Roma

Sunnudagur
11:30 Lazio - Napoli
14:00 Fiorentina - Cremonese
17:00 Verona - Torino
19:45 Inter - Bologna

Smelltu hér til að kaupa áskrift að Livey