Eiður Smári Guðjohnsen, aðstoðarlandsliðsþjálfari Íslands, telur að Ole Gunnar Solskjær verði ekki stjóri Manchester United mikið lengur.
Manchester United tapaði 0-5 gegn erkifjendum sínum í Liverpool fyrr í dag.
Pressan er orðin mikil á Solskjær eftir slaka byrjun á tímabilinu. Hann fékk mikinn stuðning með leikmannakaupum í sumar, en þrátt fyrir það er liðið átta stigum frá toppnum eftir níu leiki. Árangurinn er ekki nægilega góður.
Rætt var um framtíð Solskjær á Síminn Sport eftir leik. „Ég held hann lifi þetta ekki af. Ég held að það hafi verið of stór biti að tapa 5-0 fyrir Liverpool í dag," sagði Gylfi Einarsson og bætti við:
„Ole er búinn að gera fína hluti þarna, maður hélt hann væri á réttri leið með liðið eftir fínt tímabil í fyrra en þeir virðast ráðalausir í ár."
Eiður Smári, sem spilaði undir stjórn Solskjær hjá Molde, var sama sinnis. „Ég held því miður að þetta sé bara búið. Eins ljúfur og góður náungi Ole Gunnar Solskjær er, þá var þetta bara of stór biti, eins og Gylfi sagði."
Athugasemdir