Brendan Rodgers, stjóri Leicester City á Englandi, segir ekkert til í þeim orðrómi að hann sé á leið til Manchester United en hann var spurður út í starfið á blaðamannafundi fyrir leik Leicester gegn Legia í Evrópudeildinni.
Rodgers er einn þeirra sem hafa verið orðaðir við stjórastöðuna hjá United eftir að Ole Gunnar Solskjær var látinn taka poka sinn á dögunum.
Veðbankarnir töldu Zinedine Zidane og Rodgers líklegasta til að taka við stöðunni er Solskjær var rekinn en Rodgers segir ekkert til í því að hann sé á leið þangað.
„Það er ekkert til í þessu. Þetta er ekki satt," sagði Rodgers.
„Það er allt slúður og það verður þannig þangað til félagið mun ráða mann í starfið. Ég er skuldbundinn Leicester. Menningin hér er að þróa leikmenn og þannig sé ég það og sérstaklega á þessum kafla tímabilsins," sagði hann í lokin.
Athugasemdir