„Völlurinn verði orðinn grænn og fínn þegar við tökum á móti KR"

„Völlurinn er orðinn nokkuð góður held ég. Það er dúkur yfir honum núna til að halda aðeins meiri hita á honum þannig sprettan verði aðeins meiri. Ég held að dúkurinn verði tekinn af á fimmtudagskvöld eða föstudagsmorgun," sagði Davíð Þór Viðarsson, yfirmaður fótboltamála hjá FH, um Kaplakrikavöll í gær.

FH lék eins og frægt er orðið á frjálsíþróttavellinum - Miðvellinum - þegar liðið tók á móti Stjörnunni í fyrsta heimaleik sínum. Þá var Kaplakrikavöllur, heimavöllur félagsins, ekki orðinn klár og því spilað á varavellinum.