Heimild: Mín skoðun 

„Ég skrifaði undir frekar langan samning þó það hafi ekki verið planið að klára hann allan. Ég ætlaði að taka eitt og hálft ár kannski og svo líklega færa mig, en þetta er alls ekki í mínum höndum. Maður á tvö ár eftir af samningi og þeir stjórna þessu," segir Viðar við Valtý Björn í hlaðvarpsþættinum Mín skoðun.

Viðar segir að í sínum huga sé allt opið. Hann gæti farið annað í Evrópu en sé vissulega spenntur fyrir því að koma heim enda sé fjölskylda hans hér á landi.

„Ég mun klára ferilinn á Íslandi það er klárt, hvenær það verður er ekki alveg klárt. Það væri drullugaman að koma heim en ég á erindi í nokkur ár í viðbót úti. Ég mun setjast niður með félaginu bráðum og ræða aðeins hlutina. Fjölskyldan togar mjög mikið í, hún togar þegar maður er einn hérna úti að spila fótbolta."

Viðar viðurkennir að hafa heyrt í íslenskum félögum sem hafa athugað hvernig landið liggur hjá honum. Ef hann myndi koma heim þá færi hann alltaf í efstu deild.

„Það skiptir engu máli hvort mig langi til Íslands eða ekki. Kannski get ég það ekki fyrr en eftir tvö til þrjú ár, það er ekki nóg að langa það heldur er spurningin hvort það sé hægt," segir Viðar við Mína skoðun.

Viðar er að jafna sig á meiðslum sem stendur en tímabilið í Noregi er að klárast og hann mun ekki koma meira við sögu. Hann skoraði fimm mörk í átján leikjum fyrir Valerenga en liðið siglir lygnan sjó um miðja deild.

Viðar er uppalinn hjá Selfossi en hann spilaði einnig fyrir ÍBV og Fylki hér á landi áður en hann hélt út í atvinnumennskuna. Á atvinnumannaferlinum hefur hann spilað í Kína, Svíþjóð, Ísrael, Rússlandi, Tyrklandi auk Noregs.