Jamie Mackie, sóknarmaður QPR, meiddist alvarlega í leiknum eftir tæklingu frá Gael Givet. Mackie hafði þá brotnað á tveimur stöðum eftir tæklinguna og var borinn af velli á 31. mínútu leiksins.

Þegar verið var að bera Mackie útaf ákvað Diouf að hrauna yfir Mackie þar sem hann ásakaði leikmanninn meðal annars um leikaraskap en þetta athæfi Senegalans reitti Warnock heldur betur til reiði.

,,Mackie er stórkostlegur náungi, þess vegna var ég reiður þegar El-Hadji Diouf fór að drulla yfir hann. Allir í liðinu voru brjálaðir út í Diouf," sagði Warnock í sjónvarpsviðtali við Sky Sports.

,,Mackie fótbrotnaði eftir óþarfa tæklingu og stuttu síðar strunsaði Diouf að honum til að segja honum til syndanna. Diouf þurfti ekki að tala til Mackie eins og hann gerði.

,,Ég held að Diouf sé ræsislegur náungi. Ég ætlaði að kalla hann ræsisrottu, en nú átta ég mig á því að það gæti móðgað ræsisrotturnar. Mér finnst hann vera það lægsta sem hægt er að vera.

,,Ég býst ekki við því að hann verði hjá Blackburn mikið lengur því ég sé ekki hvernig Steve Kean getur þolað svona manneskju mikið lengur inni í búningsklefanum.

,,Ég held að hann verði látinn taka pokann sinn. Flott að losna við hann. Vonandi fer hann til útlanda, ég myndi allavega ekki sjá eftir honum."