England: City gekk frá Liverpool í síðari hálfleik

Manchester City valtaði yfir Liverpool í stórleik dagsins í enska boltanum.

Liverpool byrjaði þó betur en Mohamed Salah kom liðinu yfir eftir stundarfjórðung eftir glæsilega skyndisókn.

City var ekki lengi að jafna metin en þar var að verki Julian Alvarez sem var í byrjunarliðinu á kostnað Erling Haaland em var fjarverandi vegna meiðsla.

Staðan var jöfn í hálfleik en City gekk frá Liverpool í þeim síðari. Kevin de Bruyne skoraði fyrsta mark síðari hálfleiks strax í upphafi, Ilkay Gundogan skoraði þriðja mark liðsins eftir að Liverpool mönnum gekk illa að hreinsa boltann úr vítateignum.

Eftir það mark róaðist aðeins yfir leiknum en Jurgen Klopp reyndi svo að hrista vel upp í sínu liði þegar hann gerði fjórfalda skiptingu. Kostas Tsimikas, Roberto Firmino, Darwin Nunez og Alex Oxlade Chamberlain komu inn á.

Andy Robertson, Diogo Jota, Mohamed Salah og Harvey Elliott fóru af velli.

Fjórum mínútum síðar gerði Jack Grealish hins vegar út um leikinn með fjórða marki City.

City er því búið að minnka bilið á Arsenal í fimm stig í bili að minnsta kosti en Liverpool er áfram sjö stigum frá Meistaradeildarsæti.