Ísak Bergmann Jóhannesson var í gær seldur frá Norrköping til FC Kaupmannahafnar í Danmörku.
FCK kaupir Ísak frá Norrköping og skrifar Skagamaðurinn ungi undir samning til 2026 við FCK.
Ísak hefur vakið mikla athygli fyrir frammistöðu sína í Svíþjóð og var hann orðaður við risastór félög í Evrópu á borð við Liverpool, Manchester United og Real Madrid.
Samkvæmt BT í Danmörku þá borgar FCK tæpar 3 milljónir evra fyrir Ísak Bergmann en sænski fjölmiðillinn Aftonbladet ályktar að ef sú upphæð er rétt, að þá mun hún hækka í framtíðinni í tengslum við árangurstengdar greiðslur.
Samkvæmt heimildum þá fær ÍA 20 prósent af upphæðinni sem Norrköping selur hann fyrir. Ef upphæðin er 3 milljónir evra, þá fær ÍA 90 milljónir króna fyrir þessa sölu.
Karlalið ÍA er á botni Pepsi Max-deildarinnar og góðar líkur eru á því að það verði í Lengjudeildinni að ári.
Athugasemdir