Að minnsta kosti 174 manns hafa látið lífið í troðningi á leik í efstu deild í Indónesíu en þetta er eitt versta slys sem hefur átt sér stað á fótboltaleik.
Arema FC og Persebaya áttust við í gærkvöldi á Kanjuruhan-leikvanginum en þar mættust erkifjendur og var búist við fjörugum leik, en það breyttist í algera martröð.
Fleiri voru á vellinum en reglur segja til um og greip skelfing um sig þegar lögreglan fór að beita táragasi á stuðningsmenn sem reyndu að hlaupa inn á völlinn.
Stuðningsmenn reyndu að yfirgefa leikvanginn í flýti sem varð til þess að margir köfnuðu og er nú talið að 174 manns hafi látist í troðningi og að minnsta kosti 180 eru særðir.
Alþjóðaknattspyrnusamband, FIFA, segir fótboltaheiminn í losti og sent samúðarkveðjur til Indónesíu, en fordæmir alla notkun á táragasi á fótboltaleikjum.
Eitt vitni á leiknum segir lögregluna hafa skotið fjölmörgum skotum af táragasi í átt að stuðningsmenn og hafi mikil skelfing gripið um sig í kjölfarið.
Stuðningsmönnum Persebaya var bannað að kaupa miða á leikinn vegna fjandskap milli þessara félaga. Það hefur komið fram að 42 þúsund miðar voru seldir á leikinn en leikvangurinn tekur aðeins 38 þúsund.
Joko Widodo, forseti Indónesíu, hefur látið fresta öllum leikjum deildarinnar á meðan málið er rannsakað.
Slysið er eitt það skæðasta í sögu fótboltans. Árið 1964 dóu 320 manns og 1000 særðust er Perú og Argentínu mættust í undankeppni HM í Lima. Þá létust 39 manns á Heysel-leikvanginum í Brussel er Juventus og Liverpool áttust við í í úrslitum í Evrópukeppni meistaraliða og 97 manns létust í Hillsborough-slysinu í undanúrslitaleik Nottingham Forest og Liverpool í enska bikarnum.
Athugasemdir