Íslenski landsliðsmaðurinn Hörður Björgvin Magnússon kvaddi rússneska félagið CSKA Moskvu í síðasta mánuði eftir fjögur ár hjá félaginu en nú mánuði síðar er hann með samningstilboð á borðinu en þetta herma heimildir Fótbolta.net.
Hörður, sem er 29 ára gamall, var keyptur til CSKA frá Bristol City árið 2018, rétt fyrir HM.
Varnarmaðurinn skoraði fimm mörk í 76 deildarleikjum með rússneska félaginu en var lítið með á síðustu leiktíð vegna meiðsla.
Hann kom við sögu undir lok tímabilsins áður en samningur hans rann út.
Hörður var búinn að kveðja liðsfélaga sína og stuðningsmenn á samfélagsmiðlum og ekki í myndinni að vera áfram hjá félaginu en nú er staðan önnur.
Samkvæmt heimildum Fótbolta.net hefur CSKA boðið Herði nýjan samning en viðræður eru í gangi. Samningurinn sem CSKA bauð er til eins árs með möguleika á árs framlengingu.
Hörður er ánægður í Rússlandi og hefur fjölskyldan komið sér vel fyrir en hann er opinn fyrir hugmyndinni að vera áfram í Moskvu.
Mörg félög hafa áhuga á Herði en hann er sterklega orðaður við AEK og Panathinaikos í Grikklandi.
Athugasemdir