Í dag var íslenski landsliðshópurinn fyrir vináttuleik gegn Svíum í Abu Dhabi tilkynntur. Ekki er um opinberan landsleikjadag að ræða og stærstur hluti hópsins spilar í Skandinavíu. Fjórir leikmenn úr Pepsi-deildinni eru í hópnum.
„Það eru margir nýliðar og margir leikmenn með fáa leiki þó að við blöndum því saman með leikreyndari mönnum. Það er gaman að segja frá því að þegar við fórum að skoða listann yfir leikmenn sem eru að spila í Skandinavíu þá voru það 41. Það er úr miklum og stórum hópi að velja fyrir utan þá menn sem eru í Pepsi-deildinni," sagði Heimir Hallgrímsson landsliðsþjálfari við Fótbolta.net.
Rúnar Alex Rúnarsson, markvörðurinn ungi í KR, var valinn í hópinn.
„Hann er búinn að spila vel með U21-landsliðinu og við förum svolítið eftir þeirri frammistöðu. Við teljum hann vera framtíðarmarkmann."
Athygli vekur að Kristján Gauti Emilsson, sóknarmaður FH, er valinn en þessum unga leikmanni gekk erfiðlega að finna leiðina í markið á síðasta ári.
„Emil (Atlason) er meiddur en hann og Kristján Gauti hafa náð vel saman með U21-landsliðinu. Þeir áttu mjög flottan leik gegn Frökkum. Hann skoraði samt ekki mikið í deildinni í sumar en hann er mjög efnilegur leikmaður sem á bjarta framtíð," sagi Heimir sem er fullur tilhlökkunar fyrir því að halda út til Abu Dhabi.
„Það er gaman að fara í svona leik á svona stað. Það er 40 þúsund manna völlur. Ég efast um að það verði uppselt en það verður gaman að koma þangað."
