U21 hópurinn - Andri Lucas, Óskar og Örvar valdir

Davíð Snorri Jónasson, þjálfari U21 landsliðsins, hefur valið 20 manna hóp fyrir tvo vináttuleiki sem fram fara seinna í mánuðinum.

Andri Lucas Guðjohnsen, sem hefur verið í A-landsliðinu undanfarin ár, er í hópnum og gæti spilað sinn fyrsta U21 landsleik. Þá er Óskar Borgþórsson, sem hefur byrjað mótið vel með Fylki í Bestu deildinni, í hópnum. Örvar Logi Örvarsson í Stjörnunni gæti þá spilað sinn fyrsta yngri landsleik á ferlinum.

U21 mætir Austurríki í vináttuleik þann 16. júní ytra. Leikið verður á Stadion Wiener Neustadt. Frá Austurríki mun liðið færa sig yfir til Ungverjalands þar sem það mætir heimamönnum þann 19. júní.