Leeds United og AC Milan eru að berjast um belgíska miðjumanninn Charles De Ketelaere sem átti stórkostlegt tímabil með Club Brugge á síðustu leiktíð.
De Ketelaere er 21 árs gamall og á þegar 8 leiki að baki fyrir sterkt A-landslið Belgíu þrátt fyrir að vera í samkeppni við einhverja af bestu miðjumönnum heims um byrjunarliðssæti.
Þessi efnilegi miðjumaður kom upp í gegnum yngri landslið Belgíu og vill Club Brugge fá 45 milljónir evra fyrir hann.
Leeds er búið að bjóða rúmlega 30 milljónir evra á meðan Milan er aðeins búið að bjóða 20 milljónir. Stjórnendur Ítalíumeistaranna eru komnir í viðræður bæði við Club Brugge og leikmanninn sjálfan.
Ketelaere er fjölhæfur sóknartengiliður sem getur leikið á hægri kanti og sem fremsti maður en spilar vanalega í holunni fyrir aftan fremsta mann. Hann er hávaxinn og með frábæra sendingagetu.