Martin Ödegaard kom Arsenal yfir undir lok fyrri hálfleiks en skömmu áður hafði Richarlison skorað en markið dæmt af vegna rangstöðu.

Richarlison skoraði aftur í seinni hálfleik en aftur fékk markið ekki að standa. Hann skoraði þó gilt mark í þriðju tilraun áður en Demarai Gray skoraði sigurmarkið í uppbótartíma.

Það kom upp mjög umdeilt atvik í leiknum þar sem Ben Godfrey varnarmaður steig ofaná andlitið á Tomiyasu varnarmanni Arsenal. VAR skoðaði atvikið en Godfrey slapp án þess að fá svo gott sem gult spjald.

Gary Neville sérfræðingur á Sky Sports fullyrðir að Godfrey hafi verið að reyna að stíga á andlitið á Tomiyasu.

„Þú ert að tala við tvo snillinga í að stíga á andlit og láta það líta út eins og slys," sagði Neville en þá var hann að tala um sjálfan sig og Jamie Carragher sérfærðing á Sky og fyrrum varnarmaður Liverpool.

„Við höldum að hann hafi verið að reyna þetta. Hann áttar sig á því hvað hann hefur gert og segir bara „Æj þetta var bara slys." Sem atvinnumaður þá er það 100% að hann hafi verið að reyna þetta en ég skil af hverju VAR sagði að þetta hafi verið slys og við getum ekki sannað það. En sem atvinnumaður þá veistu það."