Það var einn leikur í spænsku úrvalsdeildinni í kvöld. Deportivo Alaves tók á móti Eibar á heimavelli sínum, Estadio de Mendizorroza.

Staðan var markalaus þegar flautað var til hálfleiks. Alaves byrjaði hins vegar seinni hálfleikinn mjög vel og skoraði Lucas Perez, fyrrum leikmaður Arsenal og West Ham, stuttu eftir að flautað var til leiks.

Skotinn Oliver Burke, sem er á láni frá West Brom, skoraði svo annað mark Alaves um miðjan síðari hálfleikinn.

Fabian Orellana náði að minnka muninn fyrir Eibar á 83. mínútu, en lengra komust gestirnir ekki.

Alaves fer með þessum sigri upp í 13. sæti deildarinnar. Eibar er sex stigum frá fallsæti í 16. sæti.