Fengum skell síðast þegar sá portúgalski dæmdi

Portúgalskir dómarar verða starfandi á Prinsavöllum á þriðjudagskvöld þegar Frakkland og Ísland eigast við í undankeppni HM.

António Nobre verður aðaldómari leiksins en hann dæmdi 4-1 sigur Wales gegn Íslandi í Þjóðadeildinni í fyrra. Ísland komst yfir í leiknum en svo hrundi allt saman í Cardiff.

Nobre hafði í nægu að snúast í þeim leik og gaf Craig Bellamy þjálfara Wales og Davíð Snorra Jónassyni aðstoðarþjálfara Íslands áminningar.

Þess má svo geta að það verða danskir dómarar á U21 landsleik Eistlands og Íslands sem fram fer á morgun. Mikkel Redder er aðaldómari leiksins.