Vonar að Havertz verði klár fyrir Lundúnaslaginn

Þýski sóknarmaðurinn meiddist á höfði er hann hoppaði upp í skallabolta við Yan Bisseck, varnarmann Inter, þannig hann fékk skurð á hausinn.

Það blæddi töluvert úr höfði Havertz áður en honum var skipt af velli fyrir Martin Ödegaard, sem var að spila sinn fyrsta leik í tæpa tvo mánuði.

Ekki er ljóst hvort hann verður klár fyrir Lundúnaslaginn um helgina.

„Kai Havertz hlaut stóran skurð en vonandi verður hann í lagi fyrir helgina,“ sagði Arteta.

Annar leikmaður Arsenal hlaut höfuðhögg í leiknum er Mikel Merino var kýldur í andlitið af svissneska markverðinum Yann Sommer.

Í því atviki vildi Arsenal fá vítaspyrnu enda fór Sommer beint í höfuð Merino er hann reyndi við boltann. Hann hlaut ekki heilahristing, heldur var hann tekinn af velli af öðrum ástæðum.

„Nei, hann fékk ekki heilahristing. Honum leið ekkert svo vel í gær þannig ég ákvað að taka hann af velli því ég þarf að hafa hann í heilu lagi,“ sagði Arteta um Merino.