Heimild: mbl.is
HK og Fylkir skildu jöfn í Kórnum í gær í hörkuleik en honum lauk með 2-2 jafntefli.
Allt stefndi í sigur Fylkis en í uppbótartíma fékk HK aukaspyrnu af löngu færi. Varamaðurinn Ásgeir Marteinsson tók spyrnuna, sem var um 30 metrum frá marki, og skoraði með skoti sem fór yfir Ólaf Kristófer Helgason.
Mikil umræða hefur verið hvort Ólafur eða Aron Snær Friðriksson eigi að verja mark Fylkis en Atli Sveinn Þórarinsson, þjálfari Fylkis, gefur loðin svör þegar hann er spurður út í það hver sé aðalmarkvörður liðsins.
„Þá átti Ólafur Kristófer Helgason að gera miklu betur í jöfnunarmarkinu, sem var skot af 30 metrum og nokkurn veginn beint á hann. Það er gott og vel að gefa ungum leikmönnum tækifæri, en þeir verða að vera tilbúnir. Eins og staðan er núna er Aron Snær Friðriksson mun betri markvörður en Ólafur. Ólafur var of bráður allan leikinn og hljóp út í nokkra bolta sem hann átti engan möguleika í. Það verður áhugavert að sjá hvort Ólafur byrji næsta deildarleik," skrifaði Jóhann Ingi Hafþórsson, blaðamaður hjá MBL, á mbl.is í gær.
Næsti leikur Fylkis er heimaleikur gegn KR á miðvikudaginn og áhugavert verður að sjá hver mun standa í markinu hjá Fylki í þeim leik.
Athugasemdir