Championship: Hollywood-liðið kastaði sigrinum frá sér - Dramatík í Lundúnum

Wrexham, sem hefur farið upp um tvær deildir tvö ár í röð, var að spila sinn fyrsta leik í næst efstu deild síðan á níunda áratugnum á meðan Southampton var að snúa aftur í B-deildina eftir að hafa fallið úr úrvalsdeildinni.

Hollywood-liðið komst yfir á 22. mínútu leiksins. Brotið var á Kieffer Moore í teignum og var það Josh Windass, nýr leikmaður Wrexham, sem skoraði úr vítinu.

Wrexham var betri aðilinn í fyrri hálfleiknum. Windass setti boltann í þverslá og fékk liðið nokkur færi til viðbótar til að bæta við fyrir lok fyrri hálfleiks, en sættu sig við eins marks forystu.

Það kom í bakið á þeim í síðari hálfleik. Southampton vann sig inn í leikinn þegar leið á, en það var ekki fyrr en á lokamínútunum sem heimamönnum tókst að ganga frá leiknum.

Ryan Manning skoraði draumamark úr aukaspyrnu átján mínútum eftir að hafa komið inn á sem varamaður og lagði síðan upp sigurmarkið fyrir Jack Stephens seint í uppbótartíma.

Ótrúlega svekkjandi fyrir Wrexham sem heilt yfir skapaði sér betri færi í leiknum en það má auðvitað hrósa karakternum hjá Southampton að koma til baka og sækja stigin þrjú.

Charlton Athletic lagði Watford að velli, 1-0, með dramatísku sigurmarki í uppbótartíma.

Harvey Knibbs kom inn af bekknum hjá Charlton á 80. mínútu, klæddi sig í skikkjuna og skoraði sigurmarkið á fjórðu mínútu í uppbótartíma.

Lærisveinar Frank Lampard í Coventry gerðu markalaust jafntefli við Hull.

Leikmenn Coventry áttu fleiri skot í leiknum en aðeins þrjú af sautján hæfðu markið á meðan Hull átti 7 tilraunir, þar af þrjár á rammann.

Southampton 2 - 1 Wrexham
0-1 Josh Windass ('22 , víti)
1-1 Ryan Manning ('90 )
2-1 Jack Stephens ('90 )
Coventry 0 - 0 Hull City

Charlton Athletic 1 - 0 Watford
1-0 Harvey Knibbs ('90 )