Pólska félagið Lech Poznan hefur greint frá frábærum fréttum um Gísla Gottskálk Þórðarson en meiðsli hans eru ekki nærrri því jafn alvarleg og talið var í fyrstu.
Íslenski landsliðsmaðurinn sneri sig illa í leik með Poznan gegn Piast Gliwice í bikarleik á dögunum.
Óttast var að Gísli yrði lengi frá og talað um að hann hafi slitið liðbönd, en Poznan segir að það hafi farið betur en á horfðist.
„Gísli var með fyrstu gráðu tognun á liðböndum í vinstra hné. Það er gert ráð fyrir því að hann snúi aftur í janúar,“ sagði Rafal Hejna, yfirmaður læknateymisins hjá Poznan.
Gísli mun því missa af þremur leikjum með liðinu. Hann verður ekki með í Íslendingaslag gegn Cracovia um helgina, og missir af leikjunum tveimur gegn Mainz og Sigma Olomouc í Sambandsdeild Evrópu.
Hann lék sinn fyrsta A-landsleik í október og lék svo gegn Aserbaísjan í síðasta glugga. Þessi 21 árs leikmaður hefur spilað 18 leiki (9 í deildinni) og skorað eitt mark fyrir Lech Poznan á þessu tímabili.
Athugasemdir
