„Við fáum mark í andlitið á okkur á 42. mínútu og við höfum ansi oft í sumar fengið á okkur mark í lok fyrri hálfleiks. Oft höfum við brotnað og komið vængbrotnir í síðari hálfleikinn en ég er ánægður með hvernig við komum í síðari hálfleikinn í dag. Ég er hundfúll að hafa ekki náð í þrjú stig." sagði Haukur Ingi Guðnason þjálfari Keflvíkinga eftir 1-1 jafntefli gegn Fjölni í kvöld.
Lestu um leikinn: Keflavík 1 - 1 Fjölnir
Haukur Ingi var ekki allt of ánægður með Pétur Guðmundsson dómara leiksins.
„Það voru ótrúleg atriði sem var ekki dæmt og það voru ótrúleg atriði sem var dæmt á. Dómararnir eru mannlegir og dæma ekki eins og maður sér þetta sjálfur eða fólk upp í stúku. Það var ýmislegt tvísýnt sem féll ekki með okkur í dag."
Farid Zato, Haraldur Freyr Guðmundsson og Sigurbergur Elísson voru allir fjarri góðu gamni vegna meiðsla í dag.
„Það er nokkuð óljóst hvernig staðan á þeim er. Ég er nokkuð viss um að þeir komi ekki í næsta leik en fari fljótlega að týnast inn, einn og einn. Það hafa verið ótrúlega mikil meiðsli og við þurfum að skoða hvað er hægt að gera betur í þeim efnum."
Hér að ofan má sjá viðtalið í heild sinni.
