Enska Championship liðið Preston hefur áhuga á að fá Andra Lucas Guðjohnsen frá belgíska liðinu Gent í sumar. Blaðamaðurinn Alan Nixon segir frá þessu. Daníel Tristan Guðjohnsen, bróðir Andra Lucasar, var orðaður við Sheffield United fyrr í sumar.
Talið er að Preston þurfi að reiða fram 2,5 milljón punda til að fá framherjann.
Þessi 23 ára gamli framherji gekk til liðs við Gent frá Lyngby í fyrra en hann hefur skorað fimm mörk í 48 leikjum. Hann hefur aðeins spilað samtals fimm mínútur í fyrstu þremur leikjum liðsins hingað til á tímabilinu. Hann var ekki í hópnum þegar liðið tapaði gegn Royale Union í gær.
Daniel Jebbison gekk til liðs við Preston í sumar en hann var ekki í fyrsta leik liðsins í jafntefli gegn QPR í gær vegna meiðsla. Michael Smith og Milutin Osmajic eru einnig á mála hjá félaginu.
Stefán Teitur Þórðarson, liðsfélagi Andra í íslenska landsliðinu, gekk til liðs við félagið í fyrra.
Athugasemdir
