16 liða úrslitunum í danska bikarnum lauk í kvöld en tvö Íslendingalið voru í eldlínunni.
Mikael Neville Anderson lék allan leikinn á miðjunni hjá AGF þegar liðið tapaði gegn Nordsjælland 2-0. Bæði lið leika í efstu deild en Nordsjælland er á toppnum á meðan AGF er í 7. sæti tíu stigum á eftir.
Elías Rafn Ólafsson var ekki í leikmannahópi Midtjylland sem tapaði gegn Viborg 3-1. Jonas Lössl var í markinu en hann hefur verið á undan Elíasi í goggunarröðinni, síðasti leikur Elíasar var í bikarnum þann 19. október.
Alex Þór Hauksson spilaði í 20 mínútur þegar Öster fékk Varberg í heimsókn í fyrri leik liðanna um sæti í efstu deild á næstu leiktíð. Leikurinn endaði með 2-1 sigri Varberg. Óskar Sverrisson leikur með Varberg en hann er meiddur.
Öster hafnaði í 3. sæti næst efstu deildar en Varberg í þriðja neðsta sæti efstu deildarinnar og fara þau því í umspil um laust sæti í efstu deild. Síðari viðureignin fer fram á sunnudaginn.
Örgryte undir stjórn Brynjars Bjarnar Gunnarssonar vann 2-0 sigur á Sandviken á útivelli í fyrri leik liðana um sæti í næst efstu deild. Síðari leikurinn fer einnig fram á sunnudaginn.
Sverrir Ingi Ingason lék allan leikinn þegar PAOK lagði Ionikos 3-0 á útivelli. Þetta er annar sigurleikur PAOK í röð en liðið er í 5. sæti eftir 12 umferðir með 22 stig.
