Lestu um leikinn: KR 1 -  3 HK/Víkingur

KR komst yfir á 9. mínútu en það tók HK/Víking aðeins tvær mínútur að jafna.

„Við höfðum allan tímann trú á að við myndum jafna þetta. Við erum með það sterkt sóknarlið að við vissum alveg að við værum að fara að skora,“ sagði Margrét Sif sem sá svo um markaskorun HK/Víkings í síðari hálfleik.

„Það var kominn tími til að setj‘ann í staðinn fyrir að leggja upp,“ sagði miðjumaðurinn sem byrjaði á að koma HK/Víkingum yfir með þrumuskoti utan teigs.

„Þetta var smá pirringsskot en það skilaði sér,“ sagði Margrét sem smellhitti boltann. Seinna markið var gjörólíkt en þá nýtti hún sér misskilning á milli varnar- og markmanns KR, stal boltanum og kom honum í netið.

„Við lásum þetta vel sem lið. Ég náði að stela honum og pota honum inn.“

Nú þegar deildin er hálfnuð eru HK/Víkingar með 10 stig sem hefur alltaf þótt gott þegar nýliðar eiga í hlut. Margrét Sif er sátt með uppskeruna en sér þó eftir stigum sem töpuðust til Grindavíkur.

„Við mættum vera með fleiri stig. Við hefðum átt að vinna Grindavík, spiluðum þann leik ekki nógu vel og hefðum átt að stela einhverjum stigum af þessum stóru liðum.“

Nánar er rætt við markaskorarann í sjónvarpinu hér að ofan en hún segist trúa því að lið hennar geti gert enn betur í síðari hluta móts.