Tyrkneska stórveldið Besiktas er að nálgast samkomulag við Nottingham Forest um félagaskipti fyrir Jota Silva.
Jota er portúgalskur kantmaður sem var keyptur til Forest í fyrrasumar fyrir um 7 milljónir evra.
Hann var notaður sem varaskeifa undir stjórn Nuno Espírito Santo en skilaði þó sínu. Hann kom við sögu í 38 leikjum á síðustu leiktíð og kom að 8 mörkum með beinum hætti, sem er nokkuð gott fyrir varamann.
Besiktas er að fá Jota á lánssamningi með árangurstengdri kaupskyldu.
Hjá Besiktas mun Jota berjast við Joao Mario, Vaclav Cerny, Cengiz Ünder og Milot Rashica.
Joao Mario, Cerny og Ünder voru allir fengnir til Besiktas í sumar, úr röðum Benfica, Wolfsburg og Fenerbahce.
Besiktas er einnig búið að næla sér í menn á borð við Wilfred Ndidi, Felix Uduokhai, Tiago Djaló og Tammy Abraham í sumar.
Jota Silva var næstum farinn til Sporting CP í sumar en félagaskiptin runnu út í sandinn á lokadegi sumargluggans.
Fabrizio Romano hefur sett „here we go!" stimpilinn á félagaskiptin.
Athugasemdir
