Svartfellingar og Serbar sjá um að dæma leik Asera og Íslendinga

Ísland þarf sigur gegn Aserbaísjan á fimmtudaginn til að vera öruggt með úrslitaleik gegn Úkraínu í lokaumferðinni í næstu viku, um sæti í umspilinu um sæti á HM.

UEFA hefur opinberað hvaða dómarateymi mun starfa á leiknum í Bakú.

Dómararnir úti á vellinum koma frá Svartfjallalandi en aðaldómari verður Nikola Dabanovic. Hann hefur áður dæmt landsleik hjá Íslandi en það var 1-1 jafntefli gegn Armeníu á Laugardalsvalli 2021 en í þeim leik skoraði Ísak Bergmann Jóhannesson sitt fyrsta landsliðsmark.

VAR dómgæslan á fimmtudaginn verður í höndum Serba en VAR dómari verður Momcilo Markovic.