Landsliðsmaðurinn Jóhann Berg Guðmundsson er ekki alveg klár í slaginn og spilar ekki með Burnley á morgun gegn Southampton í ensku úrvalsdeildinni.
Sean Dyche, knattspyrnustjóri Burnley, segir að íslenski kantmaðurinn fái auka tíma til að jafna sig svo það komi örugglega ekki bakslag í meiðslin sem hafa verið að hrjá hann.
Dyche segir annars að Jóhann Berg hafi æft vel í vikunni og litið vel út á æfingum.
Jói Berg skoraði gegn Southampton í 3-0 sigri í opnunarleik Burnley í deildinni á þessu tímabili.
Meiðsli hafa leikið hann grátt á tímabilinu og hefur hann aðeins komið við sögu í sjö deildarleikjum. Hann kom síðast við sögu í bikarleik gegn Peterborough 4. janúar síðastliðinn.
Burnley er í 11. sæti ensku úrvalsdeildarinnar.
Athugasemdir