Mynd: Getty Images

Atletico Madrid heimsótti Girona í eina leik kvöldsins í spænska boltanum og jafnframt síðasta leik 25. umferðar deildartímabilsins.

Atletico var sterkari aðilinn í leiknum og gestirnir frá Madríd óheppnir að vera ekki búnir að skora þegar venjulegur leiktími var liðinn.

Alvaro Morata kom boltanum hins vegar í netið í uppbótartíma og tryggði þar með dýrmæt stig í Meistaradeildarbaráttunni.

Markið var afar dramatískt þar sem það kom eftir hornspyrnu og flaggaði aðstoðardómarinn rangstöðu. Við nánari athugun í VAR herberginu kom í ljós að Morata var réttstæður og dæmt mark.

Atletico er í þriðja sæti spænsku deildarinnar, sex stigum fyrir ofan Real Betis sem er í Evrópudeildarsæti.

Girona, sem er í eigu City Football Group, er um miðja deild en þó aðeins fimm stigum frá fallsvæðinu.