Gary Martin er ósáttur með vítið
Gary Martin, framherji ÍBV í Pepsi Max-deildinni, er afar ósáttur með vítaspyrnuna sem FH fékk í leik liðanna í dag en hann ræddi það á Twitter.
FH vann 2-1 sigur á ÍBV á Hásteinsvelli í 12. umferð deildarinnar í dag en FH-ingar fengu vítaspyrnu eftir rúman hálftíma.
Þá virtist Diogo Coelho brjóta á Jakub Thomsen innan teigs og dæmdi Erlendur Eiríksson, dómari leiksins, vítaspyrnu. Steven Lennon steig á punktinn og skoraði.
Lucas Arnold, sérfræðingur um Pepsi Max-deildina, sagði á Twitter að honum hefði fundist þetta vera klárt víti en Gary Martin svaraði honum fullum hálsi.
„Verðskuldað víti? Ertu að reyna að æsa í mér? Ef þú heldur að þetta sé víti þá ættir þú að hætta að horfa á fótbolta," sagði Gary við Lucas.
Gary vildi augljóslega meina að eitthvað hafi orsakað fallið hjá Jakub en Ólafur Kristjánsson, þjálfari FH, staðfesti í viðtali við Fótbolta.net eftir leik að Jakub væri líklega með tognað liðband.
Gary skoraði sjálfur úr víti í leiknum en það var fyrsta markið hans fyrir Eyjamenn á tímabilinu.
Deserved penalty are you winding me up if you think that’s a penalty mate do me a favour and give up watching football
— Gaz Martin (@G9bov) July 13, 2019
Athugasemdir
