Nik Chamberlain þjálfari kvennaliðs Þróttar R. var ánægður með 3-1 sigur gegn Haukum í Mjólkurbikarnum fyrr í kvöld.
Þróttur hefur farið vel af stað í sumar og vann 10-0 í fyrstu umferð Inkasso-deildarinnar. Þróttur vann þá C-deild Lengjubikarsins á undirbúningstímabilinu og er liðið komið með sjö sigra í röð frá 21. mars.
„Við stjórnuðum spilinu stóran hluta leiksins en þreytan fór að segja til sín og við hleyptum þeim aftur inn síðasta korterið. Færanýtingin okkar hefur skánað mikið að undanförnu og það gerir gæfumuninn í svona leikjum sem eru taldir jafnir fyrirfram," sagði Nik.
Lauren Wade skoraði tvennu í leiknum og er því komin með fimm mörk í þremur keppnisleikjum hér á landi.
„Ég vildi fá Lauren fyrir síðasta tímabil en hún ákvað að vera frekar í Bandaríkjunum. Við héldum sambandi og ég er glaður með að hún sé loksins komin til félagsins. Hún er ennþá að finna taktinn, hún er ekki búin að sýna sitt besta."
