Spánn: Vítaspyrna í uppbótartíma gerði út um leikinn

Real Madrid og Barcelona áttust við í El Clasico í efstu deildinni á Spáni í dag.

Leikurinn hófst með látum en Karim Benzema kom Real yfir eftir aðeins 12 mínútna leik. Á einhvern ótrúlegan hátt náði Robert Lewandowski ekki að jafna metin stuttu síðar þegar hann skaut boltanum yfir af stuttu færi.

Í staðinn tvöfaldaði Federico Valverde forskotið og 2-0 var staðan í hálfleik.

Þegar um stundarfjórðungur var til leiksloka kallaði Lewandowski eftir því að fá vítaspyrnu þegar hann var felldur í teignum en dómari leiksins dæmdi ekkert.

Lewandowski var aftur á ferðinni stuttu síðar þegar hann átti skemmtilega sendingu á Ferran Torres sem minnkaði muninn.

Rodrygo kom inná sem varamaður þegar skammt var til leiksloka og Real fékk vítaspyrnu í uppbótartíma sem Rodrygo fékk eftir að Eric Garcia steig á hann en Rodrygo fór sjálfur á punktinn og skoraði.