Þorvaldur Örlygsson.
„Leikurinn var ágætur. Mér fannst bæði lið reyna og vinna í þessu," sagði Þorvaldur Örlygsson þjálfari Stjörnunnar eftir markalaust jafntefli gegn ÍA á Akranesvelli í kvöld.
Lestu um leikinn: ÍA 0 - 0 Stjarnan
„Þetta er eins og alltaf í maí, grasvellir eru kannski ekki upp á sitt besta eins og við vitum, og hafa ekki verið það síðan við byrjuðum að stunda knattspyrnu á Íslandi. Völlurinn var þokkalegur og skárri en Keflavíkurvöllurinn en þetta er eitthvað sem maður þarf að sætta sig við. Þar af leiðandi verða leikirnir öðruvísi og meira upp og niður bolti."
„Í heildina fannst mér við spila vel, fengum nógu mörg færi til að fá eitthvað út úr þessum leik og vinna hann. Mér fannst við vera sterkari aðilinn en vissulega hoppar boltinn ekki alltaf með manni og þeir fengu sín færi líka."
„Ég var mjög ánægður með mína menn, þeir lögðu sig fram, héldu sér við og komust í góðar stöður með hjartað í þetta. Það var mjög ánægjulegt."
Nánar er rætt við Todda í sjónvarpinu að ofan. Hann talar þar um gras og gervigrasvelli hér á landi, stöðuna á Ólafi Karli Finsen og erlendu leikmönnunum og næsta leik gegn Breiðabliki.
