Golovin segist hafa valið Mónakó framyfir Juventus og Chelsea í fyrrasumar því hann vildi ekki taka of stórt skref á þessum tímapunkti ferilsins, enda aðeins 22 ára gamall.

„Ég valdi Mónakó því hin félögin voru of stórt skref, við erum að ræða um stærstu félög Evrópu. Þetta hefði verið auðvelt val ef ég væri frá Evrópu, en ég er Rússi og þarf að aðlagast mörgum hlutum. Til að mynda tugnumálinu," sagði Golovin í viðtali við Match TV.

„Þetta var mín ákvörðun. Ég bað marga atvinnumenn og fyrrum atvinnumenn um ráð en svörin þeirra voru öll ólík. Þess vegna ákvað ég að fara eftir mínu eigin höfði."

Golovin var hjá CSKA Moskvu, þar sem Arnór Sigurðsson og Hörður Björgvin Magnússon leika í dag. Hann komst beint inn í byrjunarliðið hjá Mónakó sem átti arfaslakt tímabil en náði þó að bjarga sér frá falli úr efstu deild.