Fótbolti.net

lau 21. febrúar 2026 07:30

Ívan Guðjón Baldursson

Tudor 100% viss um að forðast fall

Mynd: EPA

Igor Tudor nýr þjálfari Tottenham svaraði spurningum á fréttamannafundi í gær, fyrir stórleik og hatramann nágrannaslag gegn Arsenal sem verður leikinn á morgun.

Tudor er nýtekinn við þjálfarastarfinu hjá Spurs eftir slakt gengi í ensku úrvalsdeildinni á sex mánuðum undir stjórn Thomas Frank og er spenntur fyrir áskoruninni.

Hann verður án ellefu leikmanna gegn Arsenal vegna ótrúlegra meiðslavandræða, auk Cristian Romero sem er í leikbanni. Tottenham er 16. sæti deildarinnar sem stendur, fimm stigum fyrir ofan fallsvæðið þegar tólf umferðir eru eftir.

„Það hjálpar okkur ekki að hugsa um fallbaráttuna, eina í stöðunni er að hugsa um vinnuna sem er framundan. Strákarnir þurfa að einbeita sér að því að leggja sig fram á hverjum einasta degi á æfingum og taka það svo með sér inn í leikina," sagði Tudor.

„Það er mikið eftir af tímabilinu og ég gef svona hlutum ekki gaum. Ég tala aldrei um úrslit leikja eða hvað við viljum afreka eftir tímabilið. Ég trúi ekki á það. Það sem ég trúi á er frammistaðan á æfingunni í dag. Þetta er það eina sem ég vil að leikmennirnir séu að hugsa um. Allur árangur veltur á því hvað við gerum á æfingasvæðinu.

„Fimm stigum fyrir ofan fallsvæðið, tíu stigum eða tveimur stigum, þetta er allt það sama. Þetta skiptir engu máli. Við þurfum að einbeita okkur að því að æfa vel og spila vel. Það hjálpar okkur ekki að horfa upp eða niður stöðutöfluna.

„Strákarnir vildu vita hver markmiðin væru og það er einfalt. Við munum vinna í gildum okkar sem liðsheild og í leikstílnum. Þetta er það sem skiptir máli, að æfa vel."

Tudor er gríðarlega spenntur fyrir að mæta Arsenal sem vermir toppsæti deildarinnar.

„Þetta er stórkostlegur leikur til að hefja dvölina á, ég hef heyrt margt gott um Arsenal og við þurfum að sýna þeim að okkur stendur ekki á sama. Við verðum að sýna þeim að við erum strax byrjaðir að breyta okkar leikstíl og styrkja gildin.

„Við erum með góða leikmenn, þeir eru með góða leikmenn. Við erum að spila á heimavelli. Við sjáum til hvernig þetta endar.

„Það er erfitt að ætla að breyta miklu á miðju tímabili, vanalega notar maður undirbúningstímabilið fyrir það, en þetta er neyðarástand og við þurfum að finna lausnir strax. Við erum að glíma við rosaleg meiðslavandræði svo við verðum bara að taka einn dag í einu."

Tudor var að lokum spurður hversu mikla trú hann hefði á því að Tottenham myndi forðast fall í vor. Þjálfarinn var fljótur að svara: „Hundrað prósent."

		L	U	J	T	ms:	mf:	mun	Stig
1	Arsenal	27	17	7	3	52	20	+32	58
2	Man City	26	16	5	5	54	24	+30	53
3	Aston Villa	26	15	5	6	37	27	+10	50
4	Man Utd	26	12	9	5	47	37	+10	45
5	Chelsea	26	12	8	6	47	30	+17	44
6	Liverpool	26	12	6	8	41	35	+6	42
7	Brentford	26	12	4	10	40	35	+5	40
8	Everton	26	10	7	9	29	30	-1	37
9	Bournemouth	26	9	10	7	43	45	-2	37
10	Newcastle	26	10	6	10	37	37	0	36
11	Sunderland	26	9	9	8	27	30	-3	36
12	Fulham	26	10	4	12	35	40	-5	34
13	Crystal Palace	26	8	8	10	28	32	-4	32
14	Brighton	26	7	10	9	34	34	0	31
15	Leeds	26	7	9	10	36	45	-9	30
16	Tottenham	26	7	8	11	36	37	-1	29
17	Nott. Forest	26	7	6	13	25	38	-13	27
18	West Ham	26	6	6	14	32	49	-17	24
19	Burnley	26	4	6	16	28	51	-23	18
20	Wolves	27	1	7	19	18	50	-32	10