Sandra María kom sér tvisvar á blað og tryggði fyrstu stig tímabilsins
Sandra María Jessen opnaði markareikning sinn með þýska félaginu Köln með því að skora bæði mörkin í 2-1 útisigri á Essen í deildinni í kvöld.
Sandra gekk í raðir Kölnar frá Þór/KA fyrir nokkrum vikum og var að leika sinn fjórða leik með liðinu.
Hún beið þolinmóð eftir fyrsta markinu sem kom á 11. mínútu leiksins og aðeins þremur mínútum síðar gerði hún annað mark sitt sem reyndist gríðarlega mikilvægt.
Flott frammistaða hjá Söndru sem tryggði Köln fyrstu stig tímabilsins og situr liðið nú í 10. sæti með 3 stig eftir fjóra leiki.
Cecilía Rán Rúnarsdóttir stóð á milli stanganna hjá Inter sem datt úr leik í deildabikarnum eftir 2-1 tap gegn Juventus í undanúrslitum. Deildabikarinn var settur á laggirnar fyrir þetta tímabil og er hálfgerður undirbúningur fyrir deildina sem hefst í byrjun október.
Karólína Lea Vilhjálmsdóttir var á bekknum en kom ekkert við sögu.
Arna Eiríksdóttir spilaði í vörninni hjá Vålerenga sem lagði Lyn að velli, 2-1, í norsku úrvalsdeildinni. Sædís Rún Heiðarsdóttir var ónotaður varamaður á bekknum.
Vålerenga er í öðru sæti deildarinnar með 52 stig, fjórum stigum frá Brann.
Bergrós Ásgeirsdóttir lék þá allan leikinn með Aarau sem tapaði fyrir Servette, 4-1, í svissnesku úrvalsdeildinni. Aarau er með aðeins eitt stig eftir fimm leiki.
Athugasemdir
