Glódís Perla Viggósdóttir er búin að ná sér af meiðslum og spilaði fyrstu 75 mínúturnar í þægilegum sigri FC Bayern í efstu deild þýska boltans í dag.
Glódís Perla mætti þar Ingibjörgu Sigurðardóttur sem var í byrjunarliðinu hjá gestaliði Freiburg og lék allan leikinn.
Bayern gjörsamlega rúllaði yfir Freiburg í leik þar sem lokatölurnar urðu 4-0. Leikurinn hefði hæglega getað endað með stærri sigri Bæjara.
Georgia Stanway átti sérstaklega glæsilegan seinni hálfleik þar sem hún lagði þrjú mörk upp en markaskorarar stórveldisins skiptu mörkunum jafnt á milli sín.
Bayern er með 10 stig eftir 4 umferðir á nýju deildartímabili. Freiburg er með 7 stig.
Breki Baldursson fékk þá að spila síðustu 20 mínúturnar í sigri Esbjerg á útivelli gegn Ringsted í 32-liða úrslitum danska bikarsins.
Það voru ekki fleiri Íslendingar sem komu við sögu í leikjum dagsins. Þórir Jóhann Helgason er í byrjunarliði Lecce gegn AC Milan í ítalska bikarnum.
Bayern 4 - 0 Freiburg
Ringsted 0 - 1 Esbjerg
Athugasemdir
