Jamie Carragher, fyrrum leikmaður Liverpool og núverandi sparkspekingur á Sky Sports, er óhress með viðtalið við hollenska miðjumanninn Gini Wijnaldum sem birtist í Guardian í gær.
Wijnaldum segir í viðtalinu við Guardian að meginástæðan fyrir því að hann hafi ákveðið að yfirgefa Liverpool sé útaf gagnrýninni sem hann fékk á samfélagsmiðlum.
Hann sagði að stuðningsmenn hafi oft valið hann sem blóraböggul og það hafi haft áhrif á ákvörðun hans um að framlengja ekki samninginn við Liverpool.
Wijnaldum samdi við PSG á dögunum og gerði þriggja ára samning en Carragher gagnrýnir ummæli Wijnaldum.
Virtir blaðamenn í Liverpool og víða um England hafa greint frá því að Wijnaldum hafi farið fram á 200 þúsund pund í vikulaun hjá Liverpool en félagið ekki samþykkt það.
Hann hafi því leitað annað. Wijnaldum var í viðræðum við Barcelona í nokkrar vikur en á síðustu stundu kom boð frá PSG sem var töluvert hærra en það sem spænska félagið bauð honum og stökk hann á það. Carragher segir því að ákvörðunin hafi í raun snúist um peninga.
„Ég elska Gini en þetta er ekki rétt. Samfélagsmiðlar eru alger sirkús og öll félög eru með trúða. Slökktu á tilkynningum í símanum ef þetta pirrar þig svona mikið eða eyddu appinu," sagði Carragher á Twitter.
„Hann vildi meiri pening og félagið neitaði. Þannig er fótboltinn stundum."
Athugasemdir