Spánn: Cadiz heldur áfram að stríða stórliðunum

Cadiz hefur farið gríðarlega vel af stað í efstu deild og er óvænt komið með ellefu stig eftir sjö umferðir. Liðið gerði markalaust jafntefli við Villarreal í dag og er það aðeins annað stigið sem Cadiz fær eftir fjóra heimaleiki.

Liðið er þó búið að vinna alla leiki sína á útivelli, síðasti sigur kom gegn Real Madrid á Santiago Bernabeu og þar áður hafði liðið betur gegn Athletic Bilbao þrátt fyrir að vera tveimur mönnum færri.

Alvaro Negredo kom knettinum í netið eftir aukaspyrnu snemma leiks í dag en markið ekki dæmt gilt vegna rangstöðu. Annars var leikurinn afar bragðdaufur þar sem heimamenn áttu ekki eina einustu marktilraun sem hæfði rammann. Gestirnir hæfðu rammann í tvígang.

Villarreal er í öðru sæti, með tólf stig eftir sjö umferðir, einu stigi meira en Cadiz.

Cadiz 0 - 0 Villarreal

Alaves vann þá sinn annan leik á deildartímabilinu er liðið heimsótti Real Valladolid.

Nacho, hægri bakvörður Valladolid, fékk beint rautt spjald þegar hann braut af sér sem aftasti varnarmaður. Hann ýtti í bakið á sóknarmanni Valladolid og vítaspyrna dæmd. Lucas Perez, fyrrum leikmaður Arsenal, steig á vítapunktinn en skaut í slánna.

Perez kom knettinum svo í netið stundarfjórðungi síðar en markið ekki dæmt gilt vegna rangstöðu.

Tíu leikmenn Valladolid réðu ekki við Alaves sem skoruðu tvö mörk eftir leikhlé.

Valladolid er á botni deildarinnar með þrjú stig eftir sjö umferðir. Alaves er með sjö stig.

Real Valladolid 0 - 2 Alaves
0-0 Lucas Perez, misnotað víti ('22)
0-1 T. Pina ('55)
0-2 B. Sainz ('85)
Rautt spjald: Nacho, Valladolid ('21)