Þýskaland: Frankfurt skoraði fjögur gegn Leipzig

Eintracht Frankfurt tók á móti RB Leipzig í lokaleik dagsins í þýska boltanum og úr varð skemmtilegur slagur sterkra liða sem eru bæði í harðri baráttu um Meistaradeildarsæti.

Heimamenn í Frankfurt voru sterkari aðilinn í fyrri hálfleik og verðskulduðu að taka forystuna þegar Ansgar Knauff skoraði á 21. mínútu.

Staðan var 1-0 í leikhlé og fékk El Chadaille Bitshiabu að líta beint rautt spjald á 50. mínútu, svo gestirnir frá Leipzig voru aðeins tíu eftir inni á vellinum.

Þeir reyndu að sækja þrátt fyrir að vera færri en enduðu á að tapa 4-0, þar sem Knauff skoraði annað áður en Hugo Ekitike og Robin Koch kláruðu dæmið. Ekitike átti einnig stoðsendingu í sigrinum.

Frankfurt er í þriðja sæti þegar þrjár umferðir eru eftir, sex stigum fyrir ofan Leipzig sem er í Evrópudeildarsæti.

Leipzig getur þó enn komist í Meistaradeildina þar sem liðið er aðeins tveimur stigum á eftir Freiburg í síðasta Meistaradeildarsætinu.