Topp tíu - Þeir bestu sem ekki hafa unnið Meistaradeildina

10) Ruud van Nistelrooy - Hollendingurinn skoraði 56 Meistaradeildarmörk en fékk aldrei að spila úrslitaleik í keppninni. Real Madrid vann keppnina þegar hann var hjá Manchester United og Manchester United vann hana þegar hann var hjá Real Madrid.

9) Patrick Vieira - Yfirgaf Arsenal og gekk í raðir Juventus þar sem hann féll út gegn gömlu félögunum í 8-liða úrslitum Meistaradeildarinnar. Í janúar 2010 yfirgaf hann Inter áður en liðið vann Meistaradeildina í maí!

8) Robert Lewandowski - Þrátt fyrir öll þessi mörk! Hann er nú 31 árs og mögulega nær hann aldrei að vinna Meistaradeildina.

7) Pavel Nedved - Eftirminnilegt var þegar Nedved skoraði magnað mark og hjálpaði Juventus að leggja Real Madrid í undanúrslitum. Nedved fékk óþarfa gult spjald og missti af úrslitaleiknum þar sem Juve tapaði í vítakeppni gegn AC Milan.

6) Fabio Cannavaro - Einn besti varnarmaður sem nútímafótbolti hefur séð. Vann gullknöttinn en náði aldrei að vinna Meistaradeildina.

5) Dennis Bergkamp - Á ferilskrá Hollendingsins eru tvenn gullverðlaun í Evrópukeppni félagsliða en hann náði ekki að landa þeim stóra.

4) Gabriel Batistuta - Batigol var magnaður leikmaður og algjör goðsögn en náði aldrei að spila í útsláttarkeppni Meistaradeildarinnar!

3) Zlatan Ibrahimovic - Hefur skorað 48 Meistaradeildarmörk í 124 leikjum á fimmtán tímabilum í keppninni.

2) Gianluigi Buffon - Þrír úrslitaleikir og allir töpuðust hjá einum besta markverði sögunnar. Það stefnir allt í að hanskarnir fari upp á hilluna án þess að hann vinni Meistaradeildina.

1) Ronaldo - Einn stórkostlegasti fótboltamaður seinni ára. Átti margar magnaðar frammistöður en meiðsli komu meðal annars í veg fyrir að hann næði að hjálpa sínum liðum til sigurs í Meistaradeildinni.