Breiðablik varð af mikilvægum stigum í titilbaráttunni í Pepsi Max-deild kvenna er liðið fór norður á Akureyri í kvöld og heimsótti þar Þór/KA.

Agla María Albertsdóttir kom Blikum í forystu eftir aðeins fimm mínútur en Colleen Kennedy svaraði því strax fyrir Þór/KA,1-1.

Á 24. mínútu kom Áslaug Munda Gunnlaugsdóttir Blikum aftur yfir og var staðan 1-2, þegar flautað var til hálfleiks.

Það virtist stefna í fínan sigur Blika en á lokamínútum leiksins jafnaði Þór/KA metin. „SENUR!!! KLAFS INNÁ TEIGNUM OG MÉR SÝNDIST ÞAÐ VERA ARNA SIF SEM KEMUR BOLTANUM INN Í MARKIÐ!" skrifaði Jóhann Þór Hólmgrímsson í beinni textalýsingu þegar Arna Sif Ásgrímsdóttir skoraði dramatískt jöfnunarmark.

Lokatölur 2-2 og getur Valur náð fjögurra stiga forskoti á Blika, á toppi deildarinnar með sigri gegn Fylki á föstudag. Þór/KA situr í sjöunda sæti.