Það var ótrúlegur leikur í sænsku deildinni í kvöld þegar Elfsborg fékk Gautaborg í heimsókn í Íslendingaslag. Kolbeinn Þórðarson var í byrjunarliði Gautaborgar sem var með 3-1 forystu í hálfleik.
Elfsborg náði að minnka muninn í 3-2 eftir rúmlega klukkutíma leik. Kolbeinn var tekinn af velli stuttu síðar.
Ari Sigurpálsson kom inn á 84. mínútu í lið Elfsborg. Johan Larsson jafnaði metin þegar þrjár mínútur voru komnar fram yfir venjulegan leiktíma. Ari átti sendingu á Simon Hedlund sem átti fyrirgjöf og Larsson skallaði boltann í netið.
Larsson tryggði síðan Elfsborg magnaðan endurkomusigur með marki tveimur mínútum síðar. Elfsborg er í 5. sæti með 32 stig eftir 17 umferðir. Gautaborg er með 25 stig í 8. sæti.
Daníel Leó Grétarsson var í byrjunarliði Sonderjyske sem steinlá 6-2 gegn Midtjylland í dönsku deildinni. Elías Rafn Ólafsson sat á bekknum hjá Midtjylland. Midtjyllland er með fjögur stig eftir tvær umferðir í 3. sæti en Sonderjyske er með eitt stig í 10. sæti.
Athugasemdir
