„Þetta var erfiður leikur, FH eru með hörku lið," sagði Adam Ægir Pálsson leikmaður Vals eftir 3-1 sigur gegn FH.
Lestu um leikinn: Valur 3 - 1 FH
„Þeir eru með sterkt og stórt lið. Það vantaði líka nokkra menn hjá okkur þannig þetta var bara gríðarlega sterkur sigur hjá okkur. Að ná stjórn á leiknum og skora snemma. Geggjað að ná að vinna leikinn þegar vantar nokkra menn hjá okkur," sagði Adam.
Adam hefur ekki fengið mikið af tækifærum síðan hann kom frá Ítalíu til Vals. Hann byrjaði leikinn í dag og lagði upp eitt mark.
„Ég er alltaf ánægður þegar ég spila, og gaman að hjálpa liðinu. Við erum bara með það gott lið að mínúturnar dreifast. Núna er ég vonandi að fá sénsinn minn og spila nokkra leiki í röð. Ég hef ekki verið að fá marga leiki í röð, það væri gaman að fá nokkra leiki í röð. Ég þarf bara að bíða og vona, annars er ég bara í góðu liði og bíð eftir mínu tækifæri aftur," sagði Adam.
Þrátt fyrir að Adam virðist þolinmóður að bíða eftir sínum tækifærum, er hann samt pirraður á að fá ekki að spila meira.
„Ég myndi ljúga því ef ég myndi ekki segja það, auðvitað er maður pirraður að spila ekki. Ég var að koma úr atvinnumennsku, þá langar manni að koma beint inn í liðið. Ég bara ber virðingu fyrir liðinu, við erum með hörku leikmenn og ég er bara rólegur. Ég er búinn að þroskast, maður þarf að bíða þolinmóður og nýta tækifærin þegar maður fær þau. Mér finnst ég búinn að vera gera það eins og á móti KA, í Evrópuleikjunum og annað. Þannig vonandi heldur þetta bara áfram," sagði Adam.
Valur er núna með tvö stig á toppi deildarinnar eftir að bæði Víkingur og Breiðablik unnu ekki í þessari umferð.
„Þeir fengu mig inn, það var það sem breyttist," sagði Adam og hló. „Efasemdir og ekki efasemdir, við erum alltaf búnir að vera með góðan hóp og núna er þetta bara búið að límast saman. Við erum með góðan liðsanda, það eru allir vinir, og við erum bara allir að róa í sömu átt. Þetta er svo langt frá því að vera búið, við erum bara með tveggja stiga forskot, og þetta er bara næsti leikur í raun og veru. Þrátt fyrir að það er klisja að segja það, og þrátt fyrir að ég hati svona klisjur í viðtölum. Þetta er samt bara staðreynd, ef við vinnum ekki næsta leik þá erum við örugglega búnir að missa toppsætið. Þannig við verðum bara að halda áfram og halda sem flestum heilum. Þá erum við bara í toppmálum," sagði Adam.
Viðtalið má sjá í heild sinni í spilaranum hér fyrir ofan.
