„Þetta var mjög erfiður leikur, eins og við bjuggumst við," sagði Srdja Tufegdzic þjálfari Vals eftir 3-1 sigur gegn FH.
Lestu um leikinn: Valur 3 - 1 FH
„Það er alltaf erfitt að spila við FH, alltaf erfitt að spila á móti liðum sem Heimir Guðjónsson þjálfar. Margt sem hefur líka áhrif, við þurfum að skipta Sigga (Sigurður Egill Lárusson) af velli á sjöundu mínutu, smá breytingar þar. Mikið af stoppum, höfuðhögg hjá Hólmari og hann dettur eitthvað út. Þannig það var rosalega erfitt í fyrri hálfleik að ná upp einhverjum strúktúr. Við fáum nokkrar mínútur þar sem við erum að spila 10 á móti 11, og þurfum að komast í gegnum það. Við skorum gott mark í byrjun leiks, og annað markið hjálpar okkur gríðarlega mikið til þess að fá smá ró eftir að FH var að þrýsta á okkur. Frederik Schram var frábær í að hjálpa okkur í gegnum erfiða kafla þar sem FH voru að vaða í færum. Á endanum bara gríðarlega mikilvæg þrjú stig fyrir okkur," sagði Túfa.
Eins og Túfa segir meiðist Sigurður Egill snemma leiks og þarf að fara af velli á börum.
„Hann fór ekki með sjúkrabíl. Hann er í klefanum, fékk sterkt högg í rfibeinin. Hann er að jafna sig þannig við bara vonum að þetta sé bara högg, og að Siggi er það sterkur karakter að hann hristir þetta bara af sér," sagði Túfa.
Patrick Pedersen jafnaði markametið með fyrsta marki leiksins. Hann hefur þá skorað 131 mark í efstu deild, jafn mikið og Tryggvi Guðmundsson.
„Ég er gríðarlega stoltur af Patrick og þetta met sem hann er að jafna í dag. Það eru svo fullt af leikjum eftir fyrir hann til að setja met sem ég held að verði mjög erfitt að slá aftur. Þannig ég er bara mjög ánægður fyrir hans hönd, og vonandi að hann haldi áfram á sömu braut," sagði Túfa.
Viðtalið má sjá í heild sinni í spilaranum hér fyrir ofan.
